Kandidati i LDK-së për kryetar të Gjilanit, Arbër Ismajli, ka njoftuar se ka arritur një marrëveshje politike për bashkëpunim me kryetarin e degës së PDK-së në Gjilan, Riad Rashiti.
Ismajli theksoi se kjo marrëveshje është një hap i rëndësishëm drejt krijimit të një qeverisjeje që bashkon qytetin.
“Falënderim të veçantë për z. Lutfi Haziri, kryetar i degës së LDK-së në Gjilan, dhe z. Riad Rashiti, kryetar i degës së PDK-së në Gjilan, për gatishmërinë, vizionin dhe frymën e bashkëpunimit që po e ndërtojmë bashkë për të mirën e qytetit tonë. Gjilani i ri meriton stabilitet, zhvillim dhe udhëheqje që bashkon. Dhe këtë do ta bëjmë bashkë me besim në Zot, me përgjegjësi dhe përkushtim ndaj qytetarëve tanë”, shkroi Ismajli.
Në rundin e dytë të zgjedhjeve, Arbër Ismajli do të përballet me Albanin Hysenin nga VV.