Lidhja Demokratike e Kosovës (LDK), Dega në Mitrovicë, ka njoftuar opinionin publik për daljen e saj nga koalicioni qeverisës në Komunën e Mitrovicës.
Gezim Plakolli, tha se vendimi ka ardhur pas veprimeve të njëanshme të kryetarit të komunës, në veçanti pas emërimit të Drejtorit të Drejtorisë për Kulturë, Rini dhe Sport pa konsultim me LDK-në.
“Emërimi i Drejtorit të Drejtorisë për Kulturë, Rini dhe Sport, i realizuar në mënyrë të njëanshme dhe pa asnjë paralajmërim nga Kryetari Peci, është në kundërshtim të plotë me dakordimet paraprake si dhe me propozimet e miratuara nga organet e LDK-së në Mitrovicë. Për këtë arsye, sqarojmë se ky emërim nuk e përfaqëson LDK-në dhe as Degën e saj në Mitrovicë. Ky vendim është obligativ për të gjithë anëtarët e LDK-së në Mitrovicë, përfshirë edhe delegatët e LDK-së në Kuvendin Komunal të Mitrovicës”, tha ai.