Kandidati i PDK-së për kryeministër, Bedri Hamza, sonte ka mbajtur një tubim masiv në Mitrovicë, në qytetin e tij.
“Sot nuk jemi këtu thjesht për një tubim. Sot jemi bashkë këtu për një betim. Një betim për familjet tona, për fëmijët tanë, për të ardhmen tonë. Ju shoh në sy dhe shoh vendosmërinë tuaj. Shoh krenarinë tuaj. Ju njoh të gjithëve. Ju kam si familje të madhe, sepse ishit ju që gjatë gjithë karrierës time, më keni mbështetur dhe më keni besuar me votën tuaj. Prandaj, me dalë para jush sot është një emocion i veçantë, meqë ne shihemi këtu çdo ditë dhe ndajmë të njëjtat preokupime! Bashkë kemi kaluar sfida të mëdha. Bashkë kemi arritur suksese të mëdha. Dhe, bashkë do të fitojmë përsëri, më 9 shkurt, për një Kosovë që mundet më mirë!”, ka thënë Hamza.
Ai ka shtuar se Mitrovica ka qenë gjithmonë zemra e zhvillimit, e përparimit dhe e krenarisë kombëtare.
“Kur Kosova ka nevojë, Mitrovica përgjigjet! Kur Mitrovica lëviz, krejt vendi shkon përpara! Dhe sot, nga qyteti i Isa Boletinit, Mehë Ukës e Artim Jasharit, le ta dëgjojë krejt Kosova se një erë e re po fryn. Dhe, më 9 shkurt, kjo frymë, kjo energji e juaja, do të shpërthejë në një fitore të madhe!”, ka thënë ai.