Gjatë vizitës së presidentit ukrainas Volodomyr Zelensky në Berlin, kancelari gjerman Friedrich Merz ka njoftuar se Berlini do të ndihmojë Kievin të zhvillojë armë të reja me rreze të gjatë që mund të godasin objektiva edhe në territorin rus.
“Ministrat tanë të mbrojtjes do të nënshkruajnë sot një memorandum mirëkuptimi për furnizimin me sisteme armësh me rreze të gjatë të prodhuara në Ukrainë”, ka thënë Merz, sipas AFP-së.
Në konferencën e përbashkët për shtyp me Zelenskyn, ai ka përmendur sërish çështjen e kufizimeve për armët me rreze të gjatë, duke thënë se më nuk do të ketë diçka të tillë.
“Nuk do të ketë kufizime në rreze, që i lejojnë Ukrainës të mbrohet plotësisht, madje edhe kundër objektivave ushtarake jashtë territorit të saj”, raportohet të ketë thënë Merz.
Ai tutje ka shtuar se prodhimi i armëve me rreze të gjatë “mund të ndodhë si në Ukrainë, ashtu edhe këtu në Gjermani,” ndërsa, nuk ka dhënë detaje të tjera.
Merz e ka cilësuar projektin si “fillimin e një forme të re bashkëpunimi ushtarak-industrial mes vendeve , që ka potencial të madh”.