Deputetja e PDK-së, Ariana Musliu-Shoshi, ka bërë me dije se ministrja e Punëve të Jashtme, Donika Gërvalla, po vazhdon në mënyrë të kundërligjshme avancimin e njerëzve të saj në shërbim diplomatik.
Ai ka publikuar vendimet e fundit të MPJD-së, të cila tregojnë se njerëzit që nuk i plotësojnë kriteret janë graduar për të shërbyer në ambasadat dhe konsullatat e Kosovës.
Në profilin e saj në “Facebook”, Musliu-Shoshi ka shkruar se këto vendime nuk janë në përputhje me ligjin.
“Në mars të vitit 2025, ministrja Gërvalla Schwarz urdhëroi mbajtjen e mbledhjeve të posaçme të Komisionit për Grada dhe Disiplinë, me qëllim të dukshëm për të promovuar në grup mbështetësit e saj politikë, të rekrutuar brenda dy viteve të fundit. Ky komision, i drejtuar nga Sekretari i Përgjithshëm, Ilir Muçaj, kishte hapur më parë (në korrik 2024) një shpallje promovimi pa datë mbylljeje, në mënyrë të paligjshme. Përkundër kësaj, ministrja ka vazhduar me mbajtjen e takimeve të veçanta, përmes të cilave rekrutët politikë shpërblehen me grada, duke mos respektuar kriteret ligjore të përcaktuara në Ligjin për MPJD-në, Ligjin për Shërbimin e Jashtëm dhe aktet e tjera përkatëse nënligjore”, ka shkruar ajo.
Ajo ka vlerësuar se këto veprime e cenojnë integritetin e shërbimit diplomatik.
“Zyrtarët e rekrutuar më pak se një vit e gjysmë më parë, të cilët duhej të ishin emëruar në gradën e atasheut, në vend të kësaj gradohen si Sekretar i Dytë dhe Sekretar i Parë. Sipas dokumenteve të siguruara, Sekretari i Përgjithshëm Ilir Muçaj dhe anëtarë të tjerë të Komisionit i kanë rekomanduar këta persona për gradime deri në Sekretar të Parë, duke anashkaluar disa grada të tjera, përfshirë atë të atasheut, sekretarit të tretë dhe, në disa raste, edhe të sekretarit të dytë. Sot është planifikuar një mbledhje e re, gjatë së cilës pritet të promovohet edhe grupi i dytë i rekrutëve politikë. Këto veprime arbitrare jo vetëm që cenojnë integritetin e Ministrisë, por edhe diskriminojnë diplomatët me përvojë, kërkesat e të cilëve për ngritje në detyrë po shpërfillen. Kjo shkelje e hapur cënon parimin kushtetues të trajtimit të barabartë dhe dëmton dinjitetin personal e profesional të zyrtarëve publikë”, ka shkruar ajo.