Ish-kryeministri Isa Mustafa ka vlerësuar se ministrat që janë zgjedhur deputetë dhe nuk kanë dhënë dorëheqje janë duke e shkelur Kushtetutën e Kosovës.
Mustafa ka thënë se ata janë në shkelje të Kushtetutës së Kosovës prej ditës së certifikimit të rezultatit zgjedhor nga KQZ-ja.
“Në bazë të leximit të Kushtetutës, anëtarët e qeverisë që janë zgjedhur deputetë, në ushtrimin e detyrës së tyre janë në shkelje ligjore dhe kushtetuese nga dita e certifikimit, jo nga dita kur iu verifikohet mandati”, është shprehur Mustafa për Nacionale.
Ish-kryetari i LDK-së ka ftuar deputetët e legjislaturës së nëntë që pas konstituimit të Kuvendit këtë çështje të adresojnë për shqyrtim në Gjykatën Kushtetuese.
“Dhënia e dorëheqjes tani nuk e korrigjon retroaktivisht shkeljen. Kuvendi do duhej të konstituohet, kurse shumica e deputetëve që me të drejtë po bëjnë vërejtje, këtë çështje ta procedojnë në Gjykatën Kushtetuese”, ka thënë Mustafa.