Një nënë e tre fëmijëve, Michele Hundley Smith, e cila u zhduk në dhjetor 2001 ndërsa shkonte për pazar për Krishtlindje në Virginia, u gjet gjallë dhe mirë pas 25 vjetësh, njoftuan autoritetet. Ajo ishte 38 vjeç kur doli nga shtëpia e saj në Eden, Karolina e Veriut, dhe nuk u kthye më.
Burri i saj e raportoi të zhdukur disa javë më vonë, dhe hetimet, që përfshinin FBI-në dhe autoritete lokale në Virxhinia dhe Karolinën e Veriut, vazhduan për 24 vjet. Tre fëmijët e saj, të moshave 19, 14 dhe 7 vjeç atëherë, kërkuan vazhdimisht të ëmën gjatë gjithë viteve.
Sipas zyrës së Sherifit të Qarkut Rockingham, Michele u gjet në një “vend të pazbuluar” në Karolinën e Veriut. Ajo tani është 62 vjeç dhe autoritetet nuk publikuan më shumë detaje rreth vendndodhjes së saj, sipas kërkesës së saj.
Kushërira e saj, Barbara Byrd, tha për WFMYNews 2 se reagimi i saj i parë ishte të vraponte jashtë dhe të bërtiste: “Është gjallë!”. Vajza e saj, Amanda, përmes Facebook-ut, përshkroi emocione të përziera, duke thënë se ndjen gëzim, zemërim dhe trishtim njëkohësisht. Ajo shtoi se nuk e di nëse do të ketë një marrëdhënie të afërt me nënën e saj, por e pranon se “nëna e saj është një qenie njerëzore si të gjithë të tjerët”.
Në vitin 2020, Amanda tregoi se zhdukja e nënës ndryshoi tërësisht Krishtlindjet e saj dhe jetën familjare. Michele u zhduk ndërsa po ngiste një Pontiac Trans Sport 1995, ngjyrë gjelbër pylli, dhe nuk u kthye kurrë atë natë. Një faqe në Facebook, “Sillni Michele Hundley Smith në Shtëpi”, u krijua për të mbledhur informacion dhe për të mbështetur kërkimet për persona të zhdukur.
Pas rikthimit të saj, pyetjet mbi ngjarjet e vitit 2001 mbeten pa përgjigje, pasi Michele ka zgjedhur të mos zbulojë detaje të jetës së saj gjatë këtyre viteve. Familja, megjithatë, është lehtësuar që ajo është gjallë dhe e shëndetshme, pavarësisht misterit që rrethon mungesën e saj 25-vjeçare.
