Nga një aksident i rëndë trafiku humbën jetën tre anëtarë të familjes Gashi nga Peja. Aksidenti ndodh mbrëmë në fshatin Çubrel, ndërsa ishte e përfshirë edhe një veturë e Policisë së Kosovës.
Gazeta raportoi mbrëmë se të vdekur kanë mbetur Zarife Gashi, rreth 70 vjeçare, Agim Gashi, rreth 50 vjeçar dhe Gyltene Gashi, rreth 48 vjeçare.
Tre anëtarëve të familjes Gashi do t’u jepet lamtumira e fundit më 28 janar, në ora 14:00, sipas njoftimit të familjes.
Funerali do të niset nga Gasallhanja.
Ndryshe, Inspektorati Policor i Kosovës ka rekomanduar suspendimin e zyrtarit policor i cili ka qenë drejtues i automjetit zyrtar të policisë në momentin e aksidentit të mbrëmshëm.
Sipas IPK-së, bazuar në veprimet fillestare hetimore dyshohet se aksidenti ka ndodhur si rezultat i mospërshtatjes së shpejtësisë së lëvizjes së automjetit zyrtar, i cili ka kaluar në shiritin e kundërt duke goditur veturën civile.
Ndaj policit të dyshuar, tashmë është lëshuar edhe urdhri për ndalim policor.