Kandidati i PDK-së për Asamblenë Komunale të Podujevës, Nexhmi Muçiqi, ka reaguar ashpër ndaj situatës politike dhe diplomatike në të cilën ndodhet Kosova, duke ngritur pyetje serioze për qasjen e institucioneve vendore.
Në një reagim publik, Muçiqi ka thënë se shqiptarët po e humbin terrenin ndërkombëtar jo për shkak të fuqisë së Serbisë, por si pasojë e gabimeve të qeverisë së Kosovës.
“Pse u katandisëm kështu!? Ku gabuan shqiptarët, që sot Serbia paraqitet si fituese në skenën ndërkombëtare, jo për shkak të fuqisë së saj, por si pasojë e terrenit që po i krijon vetë qeveria e Kosovës? Si mund të pranojmë që çlirimtarët tanë, ata që ndërtuan aleanca të pathyeshme për liri e pavarësi, të mbahen sot në pranga, ndërkohë që diplomacia serbe korr fitore?” – është shprehur Muçiqi.
Ai u ka bërë thirrje qytetarëve për vetëdijësim dhe unitet, duke theksuar se është koha për zgjim dhe veprim.
“Populli im, sa nuk është bë vonë… Zgjohuni!”, ka përfunduar Muçiqi.