Spitali “Soroko”, i cili ndodhet në qytetin jugor të Izraelit, Beersheba, është goditur nga një raketë balistike, thanë zyrtarët izraelitë, pasi Irani e kreu valën më të re të sulmeve hakmarrëse ndaj këtij shteti.
Në pamje të paverifikuara në rrjete sociale shiheshin njerëz duke vrapuar korridoreve të mbushura me pluhur e mbeturina, ndërsa mjekët duke qëndruar jashtë, pranë mbetjeve, raporton gazeta “The Guardian”.
“Duke ndodhur: Një goditje e drejtpërdrejtë është raportuar në spitalin Soroka në Beersheba, në jug të Izraelit. Më shumë hollësi do të pasojnë” – shkroi në rrjetin X Ministria e Jashtme e Izraelit.
Një zëdhënës i spitalit raportoi për “dëm ndaj spitalit dhe dëm të gjerë në zona të ndryshme. Ne tani për tani jemi duke e vlerësuar dëmin, përfshirë lëndimet. Kërkojmë nga publiku që të mos vijë në spital në këtë kohë.”
Sirenat e alarmit për sulme ajrore u dëgjuan në mbarë Izraelin më herët. Mediat izraelite raportuan se disa shpërthime të forta u dëgjuan në pjesën qendrore të vendit. U raportua për disa goditje të drejtpërdrejta.
Shpërthime u dëgjuan edhe në Tel-Aviv e Jerusalem.