Kreu i Komunës së Mitrovicës, Faton Peci, ka vendosur të shkarkojë nga detyra drejtorin e Komunës nga radhët e AKR-së, Gani Rrustemin, në të njëjtën ditë kur kryetari i GUXO-s ka humbur gjyqin me Behgjet Pacollin, pas padisë së këtij të fundit për shpifje.
Lajmin e ka bërë të ditur kryetari i AKR-së në Mitrovicë, Gjergj Beka, i cili ka deklaruar se Peci ka ndërprerë bashkëpunimin me AKR-në.
Sipas Bekës, në kuadër të këtij vendimi, Gani Rrustemi është liruar nga pozita e drejtorit për Ekonomi, Zhvillim, Turizëm dhe Integrime Evropiane.
“Pas vendimit të Gjykatës në rastin Pacolli–Peci, sot Faton Peci ndërpreu bashkëpunimin me AKR-në në Mitrovicë. Si pjesë e këtij vendimi, Gani Rrustemi lirohet nga pozita e Drejtorit për Ekonomi, Zhvillim, Turizëm dhe Integrime Evropiane”, ka shkruar Beka.
Beka ka deklaruar se AKR-ja do ta vazhdojë aktivitetin e saj në Mitrovicë, pavarësisht përfundimit të bashkëpunimit politik.
“Ne si AKR nuk ndalemi. Do të vazhdojmë të punojmë dhe të kontribuojmë për çdo të mirë të Mitrovicës dhe qytetarëve të saj”, ka deklaruar ai.
“Koalicionet mbarojnë. Përkushtimi ndaj Mitrovicës jo!”, ka përfunduar Beka.
Ndërkohë, vendimi i sotëm gjyqësor lidhet me deklaratat e Faton Pecit ndaj Behgjet Pacollit, të bëra në rrjete sociale dhe në disa emisione televizive gjatë nëntorit të vitit 2024.
Sipas Pacollit, Gjykata e ka detyruar Pecin të kompensojë dëmin jomaterial të shkaktuar nga shpifja dhe fyerja.