Me rastin e festës së Pashkëve, presidentja e Kosovës, Vjosa Osmani, ka bërë një vizitë të veçantë në fshatin Peshter të Brusit, ku është takuar me nënën Stanë Gashi dhe familjen e saj.
Gjatë luftës në Kosovë, kjo familje ishte një strehë e sigurt për qindra luftëtarë të Ushtrisë Çlirimtare të Kosovës. Nëna Stanë dhe të afërmit e saj jo vetëm që ofruan mbështetje dhe mikpritje për luftëtarët e lirisë, por edhe katër fëmijë të saj – tre djem dhe një vajzë – u rreshtuan në radhët e UÇK-së.
Postimi i saj:
Për festën e Pashkëve, në frymën e dashurisë, respektit dhe shpresës, familja jonë vizituam Nënën Stanë Gashi dhe familjen e saj në Peshter të Brusit.
Para pak muajsh kisha nderin që Nënën Stanë ta dekoroj me medaljen presidenciale “Shën Tereza”, sepse kjo nënë, dëshmoi në kohët më të rënda, se është simbol i qëndresës, humanizmit dhe dashurisë për atdheun. Gjatë luftës, ajo dhe familja e saj hapën zemrën e shtëpinë për qindra luftëtarë të lirisë, derisa edhe tre djem dhe vajza e Nënës Stanë iu bashkuan radhëve të Ushtrisë Çlirimtare të Kosovës.
Përulje e thellë dhe nderim për këtë familje madhështore, e cila mishëron krenarinë e malësisë dhe zemrën e pashoqe të Nënës Stanë, nënës së luftës për njerëzoren, lirinë dhe paqen.
Pashkë të bardha e të bekuara për të gjithë!