Komisioni Qendror i Zgjedhjeve ka përditësuar të dhënat e saj, derisa tani del se përqindja tek partitë politike ka ndryshuar.
Sipas të dhënave të KQZ-së, Lëvizja Vetëvendosje në përditësimin e djeshëm pati 40.80 për qind të votave, ose 342 mijë e 281 vota gjithsej, ndërsa në përditësimin e sotëm VV-ja del me 342 mijë e 254 vota, një rënie e lehtë e tyre.
Partia Demokratike e Kosovës nga 22.03 për qind tani është rritur në 22.05 për qind, apo nga 184 mijë e 811 në 184 mijë e 936 vota, transmeton Klankosova.tv.
Lidhja Demokratike e Kosovës u rrit në 17.64 për qind nga 17.63 për qind që ishte dje, sipas të dhënave të KQZ-së, ose gjithsej 147 mijë e 928 vota nga 147 mijë e 888 vota që kishte nga të dhënat e ditës së enjte.
AAK me partnerët e koalicionit nuk ka lëvizur as në përqindje e as në vota.
Sakaq, gjatë ditës së enjte, Albert Krasniqi, nga Demokracia plus ka treguar se si do të ndahen 100 ulëset e Kuvendit të Kosovës, të legjislaturës së nëntë.
Krasniqi bëri të ditur se Lëvizja Vetëvendosje do t’i marrë 47 ulëse në legjislaturën e nëntë, prej tyre do të jenë 28 burra dhe 19 gra.
Tutje ai tha se Partia Demokratike do të ketë 25 deputetë, 17 burra e tetë gra.
Ndërkaq LDK do t’i marrë 20 ulëse, prej tyre 14 do të jenë burra dhe gjashtë gra.
E AAK- Nisma do t’i ketë tetë deputetë, pesë burra dhe tre gra.
