Dëshmitari i dytë në rastin Banjska, Çlirim Shaqiri, gjatë dëshmisë së tij të mëtejshme shtoi se sulmi i 24 shtatorit në Banjskë ka qenë jashtëzakonisht i madh dhe me një rrezikshmëri të madhe për jetët e të gjithë zyrtarëve policorë, raporton Ekonomia Online.
“Për shkak se sulmi ka qenë jashtëzakonisht i madh, rrezikshmëria për humbjen e jetës për mua dhe kolegët e tjerë ka qenë ekstremisht e madhe. Unë kurrë gjatë jetës nuk kam dëgjuar dhe nuk jam përballur asnjë herë me një sulm të tillë, për shkak se sulmi ka qenë ekstremisht i lartë, sepse është përdorur armatim i rëndë.
Unë vazhdoj ende të jem në pushim mjekësor për shkak të gjendjes shëndetësore dhe lëndimeve të rënda fizike dhe psikologjike që kam përjetuar nga ai sulm. Vetura është goditur me armatim të rëndë, për shkak se në disa pjesë vetura është shpuar, me ç’ rast ka mbetur e prishur në atë lokacion. Sulmi në asnjë moment nuk ka pushuar. Nga momenti i shpërthimeve e deri në momentin kur jemi larguar nga lokacioni sulmit në çdo moment i është rritur intensiteti”, tha Shaqiri.
