Zotëria i Parë i Kosovës, Prindon Sadriu, ka bërë një krahasim mes takimeve që presidentja Vjosa Osmani dhe kryediplomati serb, Marko Gjuriq, patën me Sekretarin amerikan të Shtetit, Marco Rubio, në Uashington.
Përmes një postimi në platformën “X”, Sadriu ka pretenduar se ka një dallim të madh në protokollin e pritjes për dy zyrtarët nga Ballkani. Sipas tij, derisa Gjuriq ka pritur në radhë për një fotografi në korridor, presidentja Osmani është pritur brenda zyrës së Sekretarit Rubio.
“Gjuriq i Serbisë pret në radhë për një foto në korridor. Ndërkohë, Presidentja Vjosa Osmani pritet në zyrën personale të Sekretarit Marco Rubio — edhe pse mbi 20 liderë europianë ndodheshin në Uashington, D.C. po atë ditë”, ka shkruar Sadriu.
“Lidershipi nuk ka të bëjë me afërsinë me pushtetin. Ka të bëjë me fitimin e respektit”, shkroi ai.
Presidentja Osmani u takua me Rubion gjatë javës së kaluar, gjatë vizitës së saj në SHBA për të marrë pjesë në mbledhjen e parë të Bordit të Paqes.
Në anën tjetër, takimi i Gjuriqit me Rubion është komentuar edhe nga presidenti i Serbisë, Aleksandër Vuçiq, i cili dje ka deklaruar se ky takim nuk ka qenë i planifikuar paraprakisht.