Ministria e Kulturës, e Rinisë dhe e Sportit mbajti në Bibliotekën Kombëtare “Pjetër Bogdani” sesionin informues në kuadër të aktiviteteve për promovimin e programeve të Bashkimit Evropian, në të cilat merr pjesë edhe Kosova, raporton Ekonomia Online.
Udhëheqësi i Zyrës së Koordinatorit Kombëtar për IPA, Florim Canolli, tha se programet e BE-së nuk janë të ndikuara nga masat e BE-së, të cilat ju dedikohen aplikantëve që aplikojnë drejtpërdrejt në BE.
Ai tha se këto programe kanë pasur një rëndësi të madhe për organizatat vendore.
“Përfitimi është i drejtpërdrejtë, por edhe përgjegjësia e përfituesve është më e madhe. Organizatat duhet të raportojnë dhe t’i përmbahen rregullave të BE-së. Zyra jonë bashkë me ministritë përgjegjëse ofrojmë informata, sesione dhe trajtime të ndryshme që përfituesit finalë të marrin njohuritë e nevojshme për të përfituar dhe zbatuar projektet në mënyrë të suksesshme”, tha Canolli.
Ndërsa, drejtori i Institutit Francez në Kosovë dhe Këshilltar për Bashkëpunim dhe Veprimtari Kulturore, Edouard Mayoral, shprehu kënaqësinë që po japin ndihmesën e tyre për këto programe të BE-së.
“Jemi të lumtur që po kontribuojmë për këto programe në kuadër të Bashkimit Evropian”, tha ai.
