Kryeministri Edi Rama ishte i pranishëm në eventin e 10-vjetorit të Qendrës Kombëtare të Urgjencës Mjekësore, ku e cilësoi këtë si një nga sukseset më të mëdha të reformave të qeverisë.
Gjatë fjalës së tij, Rama theksoi se Urgjenca Kombëtare ka arritur standarde të krahasueshme me ato të vendeve të tjera, duke u shprehur: “Sot kemi një Urgjencë Kombëtare që nuk i lë gjë mangët, as edhe urgjencave të vendeve të tjera.”
Kryeministri gjithashtu u ndal në transformimin që ka pësuar shërbimi i urgjencës, duke e cilësuar këtë si një “histori suksesi”.
Ai e mbylli fjalën e tij me një batutë: “Për ju, që punoni çdo ditë, vendi është i sigurt në parajsë. Ne të tjerët, nuk jam i sigurt.”
Në fund të fjalës, Rama mori një jelek dhuratë nga drejtori i Urgjencës, Skënder Brataj, për të cilin ai tha me humor:
“Nuk ju premtoj që kur ta vesh do kem ndonjë urgjencë, por do ta vesh me kënaqësi dhe besoj që ju do ma toleroni që ta vesh për qejfin e ngjyrave që ka, edhe pse ndonjëherë mund ta përdor kur të shkoj të rrah ministrat në qeveri.”