Kryetari i Prishtinës, Përparim Rama, ka publikuar një video në rrjete sociale, ku prezantohen kryeqyteti dhe projekte të finalizuara në mandatin e tij.
Rama ka theksuar se Prishtina nuk është dashuri kalimtare, por përkushtim i ndershëm e i zëshëm.
“Prishtina është fryma jonë e përditshme, ritmi i punës, zëri i fëmijëve në shkolla që tash mësojnë më gjatë. Mjekët që shkojnë tek çdo derë, rrugët që janë udhë që lidhin jetën. Kjo nuk është dashni kalimtare, është përkushtim i përditshëm, i ndershëm i zëshëm. Është puna që ndien ajrin më të pastër, në parqet që frymojnë, në qytetin që po rritet me besimin tuaj”, thotë Rama në këtë video.
Ai më tutje shprehet se Prishtina është kthyer në qytet që nuk ndalet, e që premtimi mbahet.
“Prishtina nuk është ëndërr që pret, është premtim që po mbahet, qytet që nuk ndalet, e ardhmja që po ndërtojmë bashkë. Kjo është Prishtina jonë, Prishtina përtej. Dhe tani, Prishtina vendos me t’parën”, thotë Rama.