Rumania ka pësuar një goditje shembullore nga Gjykata e Arbitrazhit Sportiv (CAS) të enjten (13 shkurt) në Lausanne.
“Lajme të këqija për Rumaninë! CAS refuzoi apelin e FRF për incidentet në ndeshjen me Kosovën”, shkruan media rumune “Sport”..
CAS ka hedhur poshtë ankesën e Federatës Rumune të Futbollit (RFF) kundër dënimeve të UEFA-s për ndeshjen ndaj Kosovës.
“FRF apeloi në Gjykatën e Arbitrazhit në Lausannë dhe vendimi erdhi të enjten: CAS hodhi poshtë ankesën e FRF-së”, shkruan mël tej..
“Paneli vendosi se shkeljet e kryera nga tifozët rumunë ishin serioze dhe se sanksionet ishin në përputhje me Rregulloret Disiplinore të UEFA-s dhe jo disproporcionale. Rrjedhimisht, vendimi i kontestuar u la në fuqi nga paneli i CAS-it”, thuhet në njoftimin e kësaj gjykate.
Federata rumune u ankua në CAS, duke vlerësuar se dënimet e UEFA-s ndaj saj ishin shumë të larta. UEFA e regjistroi ndeshjen me rezultat zyrtar 3:0 në të mirë të Rumanisë, por Federatën rumune e gjobiti me 128 mijë euro dhe me zhvillimin e një ndeshjeje pa shikues.
Ndeshja Rumani – Kosovë ishte zhvilluar më 15 nëntor në Bukuresht.
Duhet theksuar se ndeshja ishte ndërprerë në minutën e 90+3, kur rezultati ishte 0:0.
Në fushë u përplasën futbollitët ndërsa në tribuna u dëgjuan thirrje “Serbia, Serbia” dhe lojtarët e Kosovës u larguan nga fusha.