Sekretari i Përgjithshëm i NATO-s, Mark Rutte, ka deklaruar se NATO-ja pritet të udhëhiqet gjithnjë e më shumë nga vendet evropiane, duke ruajtur një prani të fortë dhe të qëndrueshme të Shteteve të Bashkuara.
Duke folur për gazetarët të premten në margjinat e Konferencës së Sigurisë në Munih, Rutte theksoi se në vitet e ardhshme aleanca do të shndërrohet gradualisht në një NATO të udhëhequr më shumë nga Evropa, ndërsa SHBA-ja do të mbetet fort e përfshirë dhe pjesë thelbësore e organizatës, raporton Reuters.
Ai shtoi se ky proces do të zhvillohet hap pas hapi, në bashkëpunim të ngushtë me Shtetet e Bashkuara, duke u mbështetur në procesin e përbashkët të planifikimit të mbrojtjes brenda aleancës.
Sipas tij, rritja e ndjeshme e shpenzimeve ushtarake nga aleatët evropianë do të jetë një faktor kyç në forcimin e rolit udhëheqës të Evropës brenda NATO-s.
Rutte komentet i bëri pak kohë pasi Sekretari amerikan i Shtetit, Marco Rubio, ka folur për një moment vendimtar dhe një “epokë të re” në politikën botërore.