Një krizë diplomatike ka shpërthyer mes Spanjës dhe Izraelit, pasi kryeministri spanjoll, Pedro Sanchez, e cilësoi Izraelin si një “shtet gjenocidal”. Kjo deklaratë ka shkaktuar reagim të menjëhershëm në Tel Aviv, me Ministrinë e Jashtme izraelite që ka thirrur ambasadoren spanjolle Ana Salomon për një takim qortues në Jerusalem.
“Pas komenteve të rënda të kryeministrit spanjoll Pedro Sanchez, ambasadorja spanjolle në Izrael është thirrur për një takim qortues në Ministrinë e Jashtme në Jerusalem nesër,” thuhet në njoftimin zyrtar të Izraelit.
Deklarata e Sanchez erdhi gjatë një seance në parlamentin spanjoll, kur iu përgjigj kritikave të deputetit katalanas Gabriel Rufian, i cili e akuzoi për vazhdim të marrëdhënieve tregtare me Izraelin.
“Dua të them një gjë të qartë këtu, Rufian. Ne nuk bëjmë biznes me një shtet gjenocidal”, theksoi Sanchez.
Kjo është hera e parë që ai përdor publikisht këtë term për Izraelin – një retorikë e zakonshme e partnerëve të tij të koalicionit nga partia Sumar, veçanërisht nga zëvendëskryeministrja Yolanda Diaz.
Konflikti në Gaza ka arritur në përmasa të rënda. Deri më tani, mbi 52,900 palestinezë janë vrarë nga ofensiva izraelite, shumica gra dhe fëmijë.
Ndërkohë, Gjykata Penale Ndërkombëtare ka lëshuar urdhër-arreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, ndërsa Izraeli përballet edhe me një proces për gjenocid në Gjykatën Ndërkombëtare të Drejtësisë.