Kandidatja për deputete nga radhët e Lidhjes Demokratike të Kosovës, Shqipe Pantina, ka qëndruar në vendlindjen e saj, në Gllarevë, ku ka zhvilluar një takim tejet emocional me bashkëvendësit, në ambientet e shkollës “Dëshmorët e Qëndresës”.
Ky takim kishte një domethënie të veçantë për Pantinën, pasi pikërisht në këtë shkollë ajo ka kryer shkollimin, ka marrë për herë të parë ditarin si mësimdhënëse, ndërsa babai i saj ka shërbyer për rreth 40 vite. Ajo theksoi se mungesa e tij ndihet thellë, por mbështetja e vazhdueshme nga familja dhe bashkëvendësit i jep forcë dhe energji për të vazhduar rrugëtimin e saj politik.
“Emocionet nuk më lanë të flas, por zemra ime është plot mirënjohje për të gjithë ju që më keni qëndruar pranë gjithmonë,” u shpreh Pantina.
Takimi në Gllarevë u karakterizua nga një atmosferë solidariteti dhe mbështetje e sinqertë, duke reflektuar lidhjen e fortë të kandidates me vendlindjen dhe komunitetin e saj.