Kandidati i AAK-së për kryetar të Komunës së Rahovecit, Smajl Latifi, së bashku me kryetarin e Aleancës, Ramush Haradinaj, vizituan sot bujkun e përkushtuar Selami Haxhimustafa dhe më pas zhvilluan një takim me bujq e fermerë nga komuna.
Në këtë takim u diskutuan projektet e mëdha investive që pritet të realizohen gjatë mandatit të ri qeverisës 2025-2029, me fokus të veçantë në sektorin bujqësor.
Mes tyre u përmendën: digjitalizimi i bujqësisë, subvencionimi i shumëanshëm i sektorëve bujqësorë, këshillimi falas me ekspertë, rregullimi i rrugëve fushore, zgjerimi i bashkëpunimit me qendrat grumbulluese të perimeve dhe rrushit, mbështetje për sektorin e përpunimit dhe shumë projekte të tjera konkrete.
Latifi theksoi se Komuna e Rahovecit ka qenë gjithmonë përkrahëse e bujqve me mekanizëm bujqësor, inpute, plehra kimike, subvencione për qumështarë, mbështetje për bletarë e blegtorë, si dhe përmes granteve e serave.
“Puna dhe mbështetja për bujqit nuk ndalet, por vetëm se do të rritet dhe do të bëhet edhe më konkrete”, deklaroi Latifi.