Kandidati i Aleancës për Ardhmërinë e Kosovës (AAK) për kryetar të Komunës së Rahovecit, Smajl Latifi, ka reaguar pas lajmit se ish-Drejtori i Drejtorisë për Arsim në këtë komunë, Avni Morina, është shpallur i pafajshëm me aktgjykim të plotfuqishëm nga Gjykata Supreme e Republikës së Kosovës.
Latifi tha se është gëzuar jashtëzakonisht nga ky vendim dhe se gjithmonë ka besuar në pastërtinë, etikën, profesionalizmin dhe ndershmërinë e Morinës.
“Për hir të transparencës dhe përgjegjësisë institucionale para qytetarëve, pas vendimit të Gjykatës së Apelit e pata liruar nga detyra, por sot ndihem i lumtur që Avniu ka verifikuar pastërtinë e tij në instancën më të lartë të drejtësisë. Ky është një vërtetim edhe për punën tonë si ekip, që gjithmonë e kemi bazuar në ndershmëri, llogaridhënie dhe interesin e qytetarëve të Komunës së Rahovecit,” u shpreh Latifi.
Ai i uroi Avni Morinës shëndet, mbarësi dhe suksese në jetën profesionale.