Kandidati i AAK-së për kryetar të Rahovecit, Smajl Latifi, ka vizituar sot kompaninë e njohur “Osa Termosistem”, një emër që tashmë ka kaluar kufijtë e komunës dhe është bërë sinonim i inovacionit dhe cilësisë në gjithë vendin.
Gjatë takimit me mikun e tij, Arian Osa, Latifi u njoftua me planet e zgjerimit të kompanisë dhe investimet e reja në pajisje digjitale dhe robotike, që po e modernizojnë procesin e prodhimit.
“Osa Termosistem” aktualisht punëson 85 punëtorë dhe eksporton 60% të prodhimit të saj jashtë vendit. Kompania njihet për produktet e gastronomisë, dhomat frigoriferike, pajisjet për përpunimin e ushqimit dhe këmbyesit e nxehtësisë, duke dëshmuar standard të lartë e profesionalizëm të rrallë në këtë fushë.
Në planet e afërta, kompania pritet të zgjerohet me 2,000 metra katrorë hapësira të reja pune, gjë që do të mundësojë rritje të kapaciteteve prodhuese, punësim të ri dhe shtim të eksporteve.
Latifi falënderoi familjen Osa për mikpritjen dhe përkushtimin në zhvillimin e ekonomisë vendore, duke theksuar se bizneset e tilla janë pasqyra më e mirë e punës, inovacionit dhe shpirtit ndërmarrës të Rahovecit.
“Faleminderit për pritjen familjes Osa, e sukseset dhe puna mos u ndalshin asnjëherë!”, – u shpreh Smajl Latifi.