Zëdhënësit e Dhomave të Specializuara të Kosovës në Hagë kanë mbajtur sot një konferencë për media, ku kanë bërë të ditur se Prokuroria ka përfunduar paraqitjen e provave në rastin e Thaçit dhe të tjerëve.
Sipas zëdhënëses Angela Griep, deri më tani kanë dëshmuar gjithsej 125 dëshmitarë, ndërsa 117 dëshmi janë dorëzuar me shkrim. Procesi gjyqësor ka zgjatur 206 ditë, ndërsa janë regjistruar 150 viktima.
“Prokuroria ka konfirmuar se ka përfunduar me prezantimin e provave, por nuk e ka mbyllur zyrtarisht rastin. Seanca e radhës është caktuar më 23 prill, ku do të diskutohen hapat e mëtejshëm,” deklaroi Griep.
Ajo gjithashtu theksoi se gjyqtarët e Speciales sigurojnë një proces të drejtë dhe veprojnë në përputhje me standardet etike.
“Ka një kod etik që gjyqtarët duhet ta ndjekin, dhe nëse një i akuzuar nuk është i kënaqur me vendimin, ka të drejtë ta apelojë atë,” shtoi ajo.
Zëdhënësit e Speciales arsyetojnë pyetjet e gjyqtarëve: Janë vetëm për ta gjetur të vërtetën
Nga ana tjetër, zëdhënësi Michael Doyle tha se gjykata është e përqendruar në krimet individuale dhe se vendimet merren bazuar vetëm në prova.
Ai kërkoi nga qytetarët e Kosovës të kenë besim në këtë proces dhe theksoi se viktimat dhe dëshmitarët duhet të kenë mundësinë të dëshmojnë lirshëm.
Gjatë konferencës, gazetari i Nacionales, Besian Beha, pyeti zëdhënësen pse pas pyetjeve të gjyqtarëve nuk ka kundërpyetje nga Prokuroria, por vetëm nga avokatët.
Në përgjigje, Griep tha se kjo praktikë synon të ndihmojë në gjetjen e së vërtetës.
“Në shumë sisteme, përfshirë Gjermaninë, vetëm gjyqtarët bëjnë pyetje”, ka thënë Griep.