Ferenc Németh, studiues doktoral në Corvinus University në Budapest, në një artikull kushtuar paqartësisë së administratës amerikane karshi rajonit të Ballkanit Perëndimor, nuk beson se “çizmet amerikane” do të largoheshin nga Kosova, aq më pak që kampi Bondsteel të mbyllej.
“Ndërsa një prezencë e reduktuar amerikane në KFOR mund të jetë e mundur, nuk ka gjasa të nënkuptojë mbylljen e Kampit Bondsteel, bazës në Kosovë që është objekti më i madh i SHBA-së në rajon dhe që i ofron Uashingtonit një vendndodhje të shkëlqyer gjeopolitike në Evropë. Edhe pse kontributet amerikane në KFOR mund të zëvendësohen lehtësisht nga aleatët e tjerë (veçanërisht Turqia), mungesa e çizmeve amerikane në terren – praktikisht dhe simbolikisht – do të ndihej dhe shfrytëzohej nga fuqitë e jashtme.
Rreziku i vërtetë është që SHBA pa dashje të fillojë të çmontojë arkitekturën e sigurisë dhe politike që ka shpenzuar me dekada duke ndërtuar dhe ruajtur në Ballkanin Perëndimor. E shtyrë nga dëshira e Trump për të arritur suksese të shpejta dhe angazhimi i tij me liderë vendas admirues, kjo mund të krijojë çarjet e para në atë sistem, veçanërisht në Kosovë dhe Bosnje dhe Hercegovinë. Këto çarje me siguri do të përdoreshin dhe do të abuzoheshin nga grupe lokale dhe të jashtme, në fund të fundit me pasoja të padëshiruara dhe potencialisht serioze për Evropën”, ka shkruar ai.