Ministri në detyrë i Punëve të Brendshme, Xhelal Sveçla, ka marrë pjesë në takimin e Bordit të GCERF në Bruksel, ku është diskutuar për parandalimin e ekstremizmit të dhunshëm dhe forcimin e sigurisë sonë kolektive.
Sveçla ka thënë se gjatë takimit ai ka folur për përvojat e Kosovës në rikthimin, rehabilitimin dhe riintegrimin e personave të kthyer nga zonat e konfliktit, duke theksuar se sfidat e sigurisë evoluojnë vazhdimisht dhe kërkojnë angazhim të pandërprerë, bashkëpunim ndërinstitucional dhe partneritete të forta ndërkombëtare.
‘’ Në këtë panel nënvizova se pikërisht vullneti politik ka qenë parakusht i suksesit të Kosovës në riatdhesimin dhe riintegrimin e 123 shtetasve tanë nga veriu i Sirisë. Ky ishte një proces që e kemi udhëhequr me përgjegjësi dhe përkushtim, duke vënë në plan të parë sigurinë dhe të ardhmen e qytetarëve tanë’’, ka shkruar ai mes tjerash.
Postimi:
Kisha kënaqësinë të marr pjesë në takimin e 23-të të Bordit të GCERF në Bruksel, ku bashkë me partnerë ndërkombëtarë diskutuam për parandalimin e ekstremizmit të dhunshëm dhe forcimin e sigurisë sonë kolektive.
Në këtë forum prezantova përvojën e Republikës së Kosovës në rikthimin, rehabilitimin dhe riintegrimin e qytetarëve tanë të kthyer nga zonat e konfliktit, ku vendi ynë ka treguar lidership dhe rezultate të prekshme, me theks të veçant në mbrojtjen e grave dhe fëmijëve.
Në fjalën time, vura në theks edhe një herë se sfidat e sigurisë evoluojnë vazhdimisht dhe kërkojnë angazhim të pandërprerë, bashkëpunim ndërinstitucional dhe partneritete të forta ndërkombëtare. Për këtë arsye, vlerësoj lart bashkëpunimin me GCERF dhe mbështetjen e të gjithë aleatëve tanë në këtë rrugëtim.
Në këtë panel nënvizova se pikërisht vullneti politik ka qenë parakusht i suksesit të Kosovës në riatdhesimin dhe riintegrimin e 123 shtetasve tanë nga veriu i Sirisë. Ky ishte një proces që e kemi udhëhequr me përgjegjësi dhe përkushtim, duke vënë në plan të parë sigurinë dhe të ardhmen e qytetarëve tanë.
Po ashtu, sot para mediave të pranishme në konferencën për shtyp organizuar nga GCERF prezantova arritjet e Republikës së Kosovës që kanë reflektuar pozitivisht në çdo raport kredibil ndërkombëtar.
Republika e Kosovës do të vazhdojë të jetë e gatshme të kontribuojë në iniciativat globale të sigurisë dhe të mbetet shembull i praktikave të mira në rajon dhe më gjerë. Përkushtimi ynë mbetet i qartë: të mbrojmë qytetarët tanë dhe të ndërtojmë një të ardhme më të sigurt për të gjithë.