Gjithmonë preferojmë modele të reja dhe unike për thonjtë tanë, ndaj duket se edhe të famshmit kanë po të njëjtën mendje.
Tendenca më e fundit që po bën namin? Printi me pika (polka dots), që është më “i nxehtë” se vetë temperaturat! Deri tani i kemi parë kudo: nga pantallonat e shkurtra të Olivia Rodrigo-s, tek seti bikini i Kylie Jenner, e deri tek veshjet e Hailey Bieber.
Tani, është Dua Lipa ajo që i bashkohet trendit, por me një manikyr veror super elegant.
Në një postim në Instagram, këngëtarja ndau me ndjekësit një manikyr french ndryshe, larg klasikës me maje të bardhë. Dua kishte zgjedhur një majë të zezë mbi një bazë nude, të cilat i kishte zbukuruar me pika të bardha.
Ajo që na pëlqen më shumë? Çdo thua është e ndryshme. Disa kanë pika të bardha të shpërndara kudo, ndërsa të tjerat vetëm mbi majën e zezë. Ky kontrast bardh e zi e bën këtë manikyr një klasik të menjëhershëm. Plus, manikyri qëllimisht i çrregullt është gjithçka që duhet për të dhënë atë ndjesinë “cool girl” pa u munduar shumë.
