Kandidatja për kryetare bashkie në qytetin Texistepec të Meksikës, Yesenia Lara Gutierrez, u qëllua për vdekje të dielën mbrëma gjatë një tubimi ceremonial parazgjedhor. Sulmi, që ndodhi në sy të publikut, shkaktoi edhe vdekjen e tre personave të tjerë, ndërsa disa të tjerë mbetën të plagosur.
Ngjarja tragjike u filmua në një transmetim të drejtpërdrejtë në Facebook, ku Gutierrez shfaqej duke përshëndetur mbështetësit e saj, para se të dëgjoheshin rreth 20 të shtëna me armë zjarri.
Videoja, që dokumentoi momentet e kaosit dhe panikut, vazhdoi të ishte e disponueshme në faqen e saj të Facebook edhe pas ngjarjes.
Presidentja e Meksikës, Claudia Sheinbaum, konfirmoi sulmin në një konferencë për shtyp të hënën, duke deklaruar se motivet e këtij akti të dhunshëm ende nuk janë të qarta.
Ajo theksoi se qeveria federale është duke bashkëpunuar me autoritetet në shtetin e Veracruzit dhe ka ofruar mbështetje të menjëhershme për hetimet.
“Jemi duke bashkëpunuar me autoritetet lokale, sidomos me sekretarin e Sigurisë, dhe jemi të gatshëm të ofrojmë mbështetje të plotë gjatë kësaj periudhe zgjedhore,” deklaroi Sheinbaum, duke përmendur gjithashtu zgjedhjet e ardhshme të 1 qershorit në Veracruz dhe Durango.
Yesenia Lara Gutierrez ishte anëtare e partisë në pushtet Morena dhe një nga katër viktimat e këtij sulmi të përgjakshëm. Tre persona të tjerë u plagosën dhe janë në kujdes mjekësor, ndërsa hetimet për këtë ngjarje po vazhdojnë.