Presidenti Donald Trump pritet të nënshkruajë të hënën tre urdhra ekzekutivë që do të riformojnë ushtrinë, duke përfshirë ndalimin e anëtarëve transgjinorë që të shërbejnë në forcat e armatosura të SHBA-së, heqjen e programeve të Diversitetit, Barazisë dhe Përfshirjes (DEI) në ushtri, si dhe rikthimin në shërbim me pagesë prapavepruese të anëtarëve të larguar për refuzimin e vaksinimit kundër Covid-19, sipas dy zyrtarëve të Shtëpisë së Bardhë që folën për CNN.
Urdhrat, të cilët u raportuan fillimisht nga New York Post, vijnë ndërsa kandidati i Trump për të udhëhequr Pentagonin, Pete Hegseth, u betua si sekretar i mbrojtjes të shtunën. Hegseth ka deklaruar prej kohësh se planifikon të zbatojë ndryshime të mëdha kulturore në ushtri, përfshirë përfundimin e praktikave DEI dhe largimin e anëtarëve të shërbimit që ai i konsideron “të zgjuar” (woke).
Trump kishte ndaluar amerikanët transgjinorë të shërbenin në ushtri në vitin 2017 gjatë administratës së tij të parë, por ish-presidenti Joe Biden lëshoi një urdhër në vitin 2021 duke shfuqizuar ndalimin. Disa orë pasi u betua për mandatin e tij të dytë javën e kaluar, Trump nënshkroi një urdhër që revokonte vendimin e administratës Biden në 2021 për të lejuar anëtarët transgjinorë të shërbenin.
Megjithatë, urdhri që pritet të nënshkruhet nga Trump të hënën shkon edhe më tej, tha një nga zyrtarët, dhe do të përcaktojë standarde të reja ushtarake në lidhje me përemrat gjinorë, duke deklaruar se gatishmëria mendore dhe fizike kërkon ndalimin e anëtarëve transgjinorë nga ushtria.