Shtëpia Botuese “Albas” e Tiranës i botoi këto ditë tre libra të rinj të Sabri Hamitit, poetit, kritikut, prozatorit dhe dramaturgut tonë. I Iindur më 10 maj 1950, shkrimtari ynë i shquar mbushi 75 vjet.
“Prishtina ma amour” është një antologji e poezive të Sabri Hamitit si homazh për Prishtinën e tij e tonën, si topos të jetës e të kulturës, të dashurisë deri në dhembje personale dhe universale. Janë krijime poetike për fenomene e figura identitare të kryevendit tonë, në rrafshe aktuale dhe historike, lirike e metafizike. Poezitë janë botuar fillimisht në librat e tij poetikë “Trungu ilir” (1979), “Leja e njohtimit 1985” (1985), ”Kaosmos” (1990), “ABC” (1994), “”Melankolia” (1999), “Sympathia” (2004) dhe “Kukuta e Sokratit” (2018).
“Maja” është drama më e re Sabri Hamitit. E shkruar më 2007, e sheh dritën tash. “Dramë në tri akte e dy kohë”, vepra dramatike e tematizon luftën shqiptare për çlirim të Kosovës, e situuar në luftën dhe në pasluftën e vitit 1999. Artisti i kthyer në luftëtar e komandant, Uka, bie në altarin e lirisë, në Majë, me synimin që të mbërrinte në Burim. “Maja” e tematizon luftën e Kosovës të përthyer me fatet e familjes së kryeprotagonistit, të miqve e të bashkëluftëtarëve, të shoqërisë së pasluftës së Kosovës. “Maja” është drama e transfiguruar e Agim Ramadanit dhe e Sali Çekajt, e një beteje (Operacioni Shigjeta, Koshare) dhe e luftës së tyre për liri, me ide dhe me armë.
“The Literary Canon” [Kanoni letrar], vepra e tretë e Sabri Hamitit, që sapo doli nga shtypi, përfshin tekste të përmbledhura në anglisht të veprave kritike që ka botuar ai në këtë çerekshekull, nga “Bioletra” (2000), “Tematologjia” (2005), “Albanizma” (2009), “Utopia letrare” (2013), “Testamenti” (2018), “Enigma e poezisë” (2021), “Stilografia” (2021) dhe libri në botim “Kanoni” (2025). Kjo pjesë përbën pak a shumë gjysmën e parë të librit “The Literary Canon”. Në gjysmën e dytë botohet teksti “Letërsia shqipe në shekullin XXI”, një ligjëratë që akademik Sabri Hamiti e ka mbajtur në Akademinë e Shkencave dhe të Arteve të Sllovenisë në 25 tetor 2022. Pos në origjinalin shqip, teksti botohet edhe në përkthime frëngjisht dhe sllovenisht.
Sabri Hamiti lindi më 10 maj 1950 në Dumnicë të Podujevës. Diplomoi për gjuhë e letërsi shqipe në Universitetin e Prishtinës më 1972. Doktoroi me temë nga letërsia më 1987 në këtë Universitet.
Për një vit akademik, Hamiti specializoi teorinë e formave letrare në École des Hautes Études en Sciences Sociales në Paris ne vitin 1980/81.
Jeton dhe punon në Prishtinë.
Sabri Hamiti është autor i disa librave me poezi, pesë prej të cilëve kanë marrë çmimet më të larta nacionale në Kosovë. Ka botuar libra në fushën e kritikës: drama, roman, si dhe tekste mësimore për shkolla të mesme.