Shtetet e Bashkuara deklaruan se kanë goditur dhe zhytur një anije luftarake iraniane të klasës “Jamaran” gjatë operacioneve të fundit ushtarake kundër objektivave të Republikës Islamike.
Sipas një deklarate të ushtrisë amerikane, bëhet fjalë për një korvetë të flotës iraniane, e cila është goditur pranë një moli në Chah Bahar, në Gjirin e Omanit. “Anija aktualisht po fundoset në fund të Gjirit të Omanit”, thuhet në deklaratë.
Autoritetet amerikane shtuan se operacionet kundër objektivave iraniane po vazhdojnë dhe përsëritën thirrjen e presidentit amerikan drejtuar forcave të armatosura iraniane, Gardës Revolucionare dhe forcave të sigurisë që të “ulin armët” dhe të braktisin pozicionet.
Deri tani, Teherani nuk ka konfirmuar zyrtarisht humbjen e anijes, ndërsa mediat shtetërore iraniane nuk kanë dhënë detaje mbi dëmet në flotën detare. Anijet e klasës “Jamaran” konsiderohen pjesë e rëndësishme e kapaciteteve detare të Iranit dhe janë projektuar për operacione në ujërat e Gjirit dhe më gjerë.
Ngjarja shënon një përshkallëzim të drejtpërdrejtë në dimensionin detar të konfliktit mes SHBA-së dhe Iranit. Gjiri i Omanit përbën një korridor strategjik pranë Ngushticës së Hormuzit, nga ku kalon një pjesë e konsiderueshme e furnizimit global me naftë. Çdo zhvillim ushtarak në këtë zonë rrit shqetësimet për sigurinë detare dhe stabilitetin e tregjeve ndërkombëtare të energjisë.