Analisti politik Visar Ymeri, në emisionin “FORUM” në DTV Media, ka folur për protestat e zhvilluara në Kosovë dhe ndikimin që, sipas tij, ato mund të kenë në zhvillimet politike në vend.
Ymeri ka thënë se protestat përbëjnë një formë presioni ndaj pushtetit dhe se ky presion, sipas tij, pritet të ndihet në ditët në vijim.
“Pushteti ka me ndje presionin përmes këtyre protestave”, ka deklaruar Ymeri.
Duke folur për situatën aktuale politike, Ymeri është ndalur edhe te mundësia e zgjedhjeve të reja, përfshirë skenarin e zgjedhjeve në nëntor të këtij viti.
Ai ka folur gjithashtu për mundësinë e një marrëveshjeje mes PDK-së dhe Lëvizjes Vetëvendosje, duke theksuar se një bashkëpunim i tillë, sipas tij, do të mund të kishte kuptim nëse ekziston një plan konkret për përballjen me zhvillimet pas verdiktit në Hagë.
Në një tjetër deklaratë gjatë emisionit, Ymeri ka theksuar se një marrëveshje politike nuk duhet parë vetëm në aspektin e ndarjes së pushtetit, por duhet të jetë e qartë se për çfarë qëllimi dhe me çfarë plani po bëhet.
Sipas tij, institucionet e Kosovës mund të ndërmarrin veprime që mund të ndihmojnë proceset që lidhen me Hagën, ndërsa zhvillimet politike dhe protestat mund të ndikojnë në vendimmarrjen e partive në ditët në vijim.
Deklaratat e Ymerit vijnë në një periudhë të zhvillimeve të shumta politike, ku në skenë janë diskutimet për protesta, mundësinë e zgjedhjeve të reja dhe një bashkëpunim të mundshëm mes subjekteve kryesore politike.