Ministri i Shëndetësisë, Arben Vitia, ka njoftuar për vazhdimin e investimeve në Klinikën e Onkologjisë në QKUK, duke theksuar se gjatë mandatit qeverisës është vendosur akseleratori i tretë linear për terapinë rrezatuese.
Sipas Vitisë, falë këtyre investimeve, lista e pritjes për trajtimin me radioterapi është tashmë zero, një arritje e rëndësishme për pacientët onkologjikë në Kosovë. Për funksionimin e pajisjes së re është ndërtuar edhe bunkeri përkatës, në përputhje me standardet ndërkombëtare të sigurisë radiologjike.
Vlera e përgjithshme e projektit kap shumën prej 2.7 milionë euro. Ministri Vitia theksoi se me këto investime, Kosova sot qëndron krah vendeve si Kroacia dhe Sllovenia për nga niveli i zhvillimit dhe cilësisë së trajtimit të pacientëve onkologjikë.