Një vajzë e mitur është raportuar e zhdukur në Gjilan, pasi që nga 13 marsi nuk është kthyer më në shtëpi dhe familja nuk ka arritur të ketë asnjë kontakt me të.
Rasti është paraqitur në Stacionin Policor në Gjilan rreth orës 00:55 të datës 15 mars, nga nëna e saj L.B., e cila ka raportuar se vajza e saj R.K. (14-vjeçare) është larguar nga shtëpia më 13 mars rreth orës 13:00, duke u nisur për në shkollën “Musa Zajmi”.
Sipas deklarimit të nënës, e mitura është parë po atë ditë rreth orës 14:00 në shoqërinë e një personi rreth 20-vjeçar, i identifikuar si E.B.
Kontakti i fundit me vajzën është bërë përmes rrjeteve sociale, ku ajo kishte thënë se ndodhej te një shoqe. Që nga ora 18:00 e datës 13 mars, familja nuk ka pasur më asnjë kontakt me të, ndërsa telefoni i saj ka mbetur i fikur.
Policia ka nisur veprimet për lokalizimin e të miturës dhe sqarimin e rrethanave të zhdukjes, ndërsa për rastin pritet të ndërmerren edhe veprimet e nevojshme në koordinim me Prokurorin kujdestar.
Autoritetet u bëjnë thirrje qytetarëve që nëse kanë ndonjë informacion për vendndodhjen e të miturës R.K., ta njoftojnë menjëherë policinë.