Zyra e Rregullatorit për Energji ka bërë të ditur se nuk ka pasur asnjë bllokim të pranimit në e-mail adresën e dedikuar për komente, raporton Ekonomia Online.
Përmes një komunikate për media, ZRrE-ja ka bërë të ditur se kanë pranuar të gjitha komentet e qytetarëve sa i përket ankesave të tyre rreth rritjes së çmimit të energjisë elektrike. Ky institucion rregullues i energjisë ka premtuar se të gjitha komentet do të marrin përgjigje.
“Në lidhje me disa reagime nga qytetarët se kanë raportuar rreth vështirësive në lënien e komenteve dhe bllokime të sistemit të pranimit të komenteve gjatë periudhës së fundit, Zyra e Rregullatorit për Energji dëshiron të bëjë të ditur se të gjitha komentet e dërguara nga qytetarët janë marrë në shqyrtim dhe nuk ka pasur asnjë bllokimi të pranimit në e-mail adresën e dedikuar për komente. ZRRE-ja siguron qytetarët se çdo komunikim është trajtuar me seriozitet dhe se të gjitha ankesat dhe komentet janë regjistruar në sistemin e institucionit pa asnjë ndërprerje. Pas verifikimeve të kryera, rezulton se nuk ka pasur asnjë problem teknik në sistemin e pranimit të komenteve. Ne sigurojmë që të gjithë qytetarët dhe palët tjera që kanë dërguar komente do të kenë mundësi të marrin përgjigje rreth tyre”.
Në fund, ZRRE-ja ka bërë të ditur se është e angazhuar për një komunikim të hapur dhe transparent me qytetarët dhe do të vazhdojë të ofrojë mundësinë për dërgimin e komenteve dhe ankesave.