Një grup turistësh spanjollë ndodhen në rrezik për jetën pasi janë bllokuar në kanionin e thellë dhe të vështirë të Nivicës, një nga zonat më të egra dhe më pak të eksploruara në jug të Shqipërisë.
Ngjarja është bërë e ditur nga studiuesi i njohur dhe aktivisti i trashëgimisë kulturore dhe natyrore, Auron Tare.
Ai ka ngritur alarmin përmes një postimi publik, duke konfirmuar se situata është kritike dhe se autoritetet janë njoftuar menjëherë.
“Forcat e policisë dhe zjarrfikësit janë nisur drejt vendit për të ndihmuar në operacionin e shpëtimit,” ka bërë të ditur Tare, duke theksuar vështirësitë e terrenit dhe rrezikun që paraqet kjo zonë për këdo që e viziton pa përgatitje dhe pa guida lokale.
Ndërkaq në ndihmë kanë shkuar dhe forca policore nga Gjirokastra të pajisur me dron.
Ai kujton gjithashtu se vetëm një ditë më parë, kishte paralajmëruar që askush të mos hynte në kanionin e Nivicës pa praninë e një udhërrëfyesi vendas.
“Kjo është një zonë e egër dhe me rrezikshmëri të lartë nëse nuk e njeh terrenin. Nuk është vend për eksplorim të lirë,” ka shkruar Tare.
Raportohet se spanjollët kishin deklaruar se kishin marrë leje për hyrjen në zonë nga Ministria e Turizmit, dhe kishin vendosur të hynin në kanion pa udhërrëfyes vendas.
Kanioni i Nivicës është një prej destinacioneve më të bukura natyrore në Shqipëri, por edhe një prej më të vështirëve për eksplorim.
Thellësia, rrjedha e ujit, mungesa e sinjalit dhe terreni i thyer janë faktorë që e bëjnë veçanërisht të rrezikshëm për ata që nuk janë të pajisur me eksperiencën dhe pajisjet e nevojshme.
Aktualisht, nuk ka ende informacion të detajuar mbi gjendjen shëndetësore të turistëve apo vendndodhjen e saktë të tyre brenda kanionit.
Autoritetet janë në terren dhe po punojnë me urgjencë për të ndërmarrë një operacion shpëtimi, ndërsa pritet mbërritja e ekipeve të specializuara për operacione malore dhe ndërhyrje në terrene të vështira.