Një gjest shembullor është shënuar në Shtime, ku një 14-vjeçare nga fshati Davidovc ka gjetur një portofol me para dhe dokumente personale, të cilin më pas e ka dorëzuar në stacionin policor.
Rasti ka ndodhur dje rreth orës 10:00.
Sipas Policisë, e mitura E. Baftiu ka gjetur portofolin në të cilin ndodheshin 260 euro dhe dokumente identifikuese.
Pas dorëzimit të tij në polici, bazuar në dokumentet e gjetura është identifikuar pronari, E.M., 17 vjeç nga fshati Reçak.
I riu është njoftuar dhe më pas është paraqitur në stacionin policor në Shtime, ku e ka tërhequr portofolin.
Drejtoria Rajonale e Policisë në Ferizaj e ka falënderuar 14-vjeçaren për ndershmërinë, përgjegjësinë dhe gjestin e saj shembullor qytetar.