Analisti politik Korab Blakaj ka reaguar ashpër ndaj paraqitjes së Branislav Kerstiç në studion e Klan Kosovës, duke e akuzuar atë për gënjeshtra, shpifje dhe sulme ndaj institucioneve të Republikës së Kosovës.
Në një reagim publik, Blakaj ka cituar shkrimtarin serb Dobrica Qosiq, duke theksuar se “Gënjeshtra është interes shtetëror serb. Gënjeshtra është në vetë qenien e serbit. Gënjeshtra është mënyra e luftës së serbit.” Sipas tij, kjo filozofi po vazhdon të reflektohet edhe në qëndrimet e Kerstiç, të cilin e akuzon për tentativë denigrimi të Policisë së Kosovës dhe të veprës së heroit Afrim Bunjaku.
Blakaj e cilëson si të papranueshme praninë e kësaj narrative serbe në studiot e mediave kosovare, duke theksuar se është thellësisht denigruese për viktimat dhe përkushtimin e pjesëtarëve të institucioneve të sigurisë në mbrojtje të integritetit dhe sovranitetit të vendit.
“Branislav Kerstiç gënjen, shpif, sulmon institucionin e Policisë së Kosovës dhe denigron veprën sublime dhe Heroin tonë Afrim Bunjaku! Narrativa serbe në studio është e papranueshme dhe thellësisht denigruese”, ka deklaruar Blakaj.