Komisioni Qendror i Zgjedhjeve (KQZ) ka bërë të ditur se po vazhdon periudha për njoftimin e pjesëmarrjes ose mospjesëmarrjes në zgjedhje, si dhe deklarimin e koalicioneve zgjedhore për zgjedhjet e parakohshme për Kuvendin e Kosovës, të cilat do të mbahen më 7 qershor 2026.
KQZ ka bërë të ditur se afati 7-ditor ka nisur më 1 maj dhe do të përfundojë më 7 maj 2026.
Gjatë kësaj periudhe, të gjitha partitë politike të regjistruara në Republikën e Kosovës janë të obliguara të njoftojnë KQZ-në, përmes Zyrës për regjistrim, certifikim dhe kontrollin financiar të subjekteve politike, lidhur me pjesëmarrjen në zgjedhje, mospjesëmarrjen apo formimin e koalicioneve.
Sipas KQZ-së, këto obligime vlejnë për 53 partitë politike të regjistruara në vend.
Për informacione shtesë, zyra ka vënë në dispozicion edhe një numër kontakti, 038 200 81 010, i cili është i qasshëm nga ora 08:00 deri në 16:00.në 16:00.
Por a do të garoj sërish Lista për Familjen edhe në këto zgjedhje?
Në zgjedhjet 28 dhjetorit të vitit që shkoi, Partia Demokratike e Kosovës garoj së bashku në koalicion me Listën për Familjen.
E nga këto zgjedhje u arrit që Lista për Familjen ta ketë një deputet. Saktësisht në legjislaturën që e lamë pas të Kuvendit të Kosovës, në grupin parlamentar të PDK-së ishte edhe prijësi i Listës për Familjen, Eman Rrahmani.
Por, tani kur kanë mbetur edhe më pak se dy ditë deri në deklarimin e koalicioneve shtrohet pyetja se a do të kenë përsëri koalicion PDK dhe Lista për Familjen?
Në lidhje me këtë, lajmi.net ka kontaktuar me të parin e Listës, Eman Rrahmanin. Në përgjigjen e dhënë, Rrahmani tha se këto ditë do të vendoset.
“Jemi në diskutime dhe këto ditë do të vendosim. E rëndësishme është që kemi pas një bashkëpunim të shkëlqyer në këtë legjislaturë”, u shpreh Rrahmani për lajmin.
Sipas tij, detajet përfundimtare të bashkëpunimit do të sqarohen pas arritjes së marrëveshjes, e cila pritet të përcaktojë edhe formatin e bashkëpunimit politik mes palëve.
Duhet përkujtuar se Rrahmani në legjislaturën e kaluar ishte shumë i zëshëm sa i përket çështjeve të familjes që prekin shoqërinë kosovare.
Këto do të jenë zgjedhjet e treta parlamentare që Lista Për Familjen do të marr pjesë.