Kryetari i LDK-së, Lumir Abdixhiku, ka bërë të ditur se ka refuzuar dorëheqjen e Xhafer Gashit pas rezultateve të zgjedhjeve në Obiliq, duke e rikonfirmuar atë në pozitat e tij brenda partisë.
Në një postim në Facebook, Abdixhiku theksoi se LDK-ja nuk i braktis njerëzit e saj në momente të vështira.
“Xhaferi është një prej njerëzve që nuk dorëzohet para vështirësive. Ai është njeri i fjalës, i punës dhe i përkushtimit të heshtur ndaj qytetarëve të tij. Në këto vite, ai i ka dhënë Obiliqit drejtim, dinjitet dhe stabilitet; në një komunë që ka parë shumë sfida. Sot, më shumë se kurrë, Lidhja Demokratike e Kosovës ka nevojë për njerëz të tillë, me karakter, me vizion dhe me besim në vlera. Prandaj, e kam rikonfirmuar Xhafer Gashin në pozitat e tij brenda LDK-së, si në Degë të Obiliqit, ashtu edhe në Kryesi e Këshill të Përgjithshëm. Sepse LDK nuk i braktis njerëzit e saj në një moment të vështirë; përkundrazi, LDK di të trajtojë edhe fitoren edhe humbjen me plot dinjitet”, shkroi Abdixhiku.
Tutje, ai shtoi se “LDK qëndron. Dhe bashkë me të, qëndron edhe Xhafer Gashi, në të gjitha sfidat përpara; si simbol i qëndrueshmërisë, i besnikërisë dhe i misionit tonë të përbashkët”.