Kryetari i Lidhjes Demokratike të Kosovës, Lumir Abdixhiku, ka reaguar ashpër ndaj mënyrës se si po shpërndahen subvencionet dhe grantet në vend, duke akuzuar pushtetin aktual për favorizime.
Përmes një postimi, Abdixhiku tha se në Kosovë fatin nuk e provojnë më qytetarët, por familjarët e pushtetarëve, të cilët, sipas tij, përfitojnë në çdo sektor.
“Le ta provojnë fatin. Se në Kosovë, fatin nuk e provojnë më qytetarët — por familjarët e pushtetarëve. Edhe në subvencione, edhe në grante, edhe në shitblerje të megavatëve. Fat familjarëve”, ka shkruar ai.
Ai ka përmendur nevojën për krijimin e një strukture të ngjashme me SPAK-un në Shqipëri, për të luftuar korrupsionin dhe për të siguruar drejtësi.
“Kosovës ndërsa i duhet një ‘SPAK’. Le ta ‘provojnë fatin’ aty më pas. Do ta bëjmë!”, përfundoi Abdixhiku.