Abdixhiku sulmon qeverisjen e VV-së, duke thënë se vendi po përballet me katastrofë dhe se qytetarët presin ndryshim përmes LDK-së.
Kryetari i Lidhjes Demokratike të Kosovës, Lumir Abdixhiku, ka akuzuar Lëvizjen Vetëvendosje për gjashtë vite qeverisje që kanë prodhuar rezultate katastrofike, rritje të çmimeve dhe fatura energjie edhe më të shtrenjta.
Në një deklarim publik, Abdixhiku tha se qytetarët po paguajnë çmime të larta si pasojë e, siç u shpreh ai, përfitimeve milionëshe nga importi i energjisë.
“Atje Vuk Hamoviçi po përfiton miliona pare të Kosovës prej importit të energjisë elektrike, të cilën këta tentojnë me e fshehë. Edhe dje, edhe sot nga 300-400 mijë euro në ditë t’i fitojnë. Pra, ky është patriotizmi fals i tyre”, deklaroi kreu i LDK-së.
Ai theksoi se fatin e Kosovës nuk duhet t’ua lëmë atyre që kanë për qëllim rrënimin e shtyllave identitare të shtetit, duke shtuar se populli dhe partitë e tjera politike po presin nga LDK-ja të marrë drejtimin.
“Populli pret prej LDK-së. Edhe partitë tjera janë duke pritë prej LDK-së. Nuk mbet parti në Kosovë që s’thotë po du me LDK-në. Krejt duan me LDK-në. Elektorati i tyre po thotë duam me LDK-në. Nëse po doni kaq shumë me LDK-në, votojeni LDK-në”, tha ai.
Duke iu referuar Vetëvendosjes, Abdixhiku tha se VV përdor fyerjet për propagandë, ndërsa në prapaskenë kërkon një marrëveshje politike me LDK-në.
“Neve na thonë po donë me kthy Serbinë në Kosovë. Kush po do me kthy Serbinë në Kosovë? Për vitin 2025-2026 kjo është gjuha e tyre e vetme që u ka mbetur. Dhe si të përfundon kjo gjuhë e tyre në mbrëmje, ditën ta shtrojnë ofertën, thonë: ‘hajde LDK-ja me u bë me neve bashkë, ju lutem se veç ju jeni më të mirët’”, u shpreh Abdixhiku.
Ai ka ftuar qytetarët që të votojnë LDK-në në zgjedhjet e 28 dhjetorit për “t’i dhënë fund kësaj qeverisjeje”.