FKV Hajvalia fituese e dy çmimeve në festivalin Kombëtar “Folk Fest”
Ansambli i Folklorik i këngëve dhe valleve “Hajvalia” ka shënuar një tjetër sukses të madh duke u shpallur fitues i dy çmimeve në festivalin Kombëtar “Folk Fest”.
Në këtë ngjarje të madhe kulturore, e cila mbledh artistë nga mbarë vendi dhe diaspora, ansambli “Hajvalia” u vlerësua me Çmimin e parë për orkestrën më të mirë, duke dëshmuar nivelin e lartë artistik dhe profesionalizmin në interpretimin e melodive tradicionale shqiptare.
Po ashtu, veçmas u nderua edhe muzikanti i talentuar i ansamblit, Jakup Demolli, i cili fitoi çmimin prestigjioz për instrumentistin më të mirë. Ky vlerësim dëshmon përkushtimin dhe mjeshtërinë e tij në ruajtjen dhe promovimin e trashëgimisë muzikore shqiptare.
Ky sukses i dyfishtë është një dëshmi e punës së palodhshme të anëtarëve të ansamblit “Hajvalia” dhe një motivim i madh për të vazhduar rrugëtimin në kultivimin dhe promovimin e vlerave të pasura folklorike të vendit.