Bordi i Asociacionit të Komunave të Kosovës (AKK) ka kërkuar nga Ministria e Financave që ta procedojë menjëherë projektligjin që mundëson financimin e shërbimeve sociale përmes grantit specifik, duke theksuar se komunat e kërkojnë këtë mekanizëm që nga viti 2022.
Sipas AKK-së, Ministria e Financave e ka tërhequr projektligjin për ndryshimin e Ligjit për Financat e Pushtetit Lokal, i cili parashihte këtë grant, dhe prej vitesh nuk e ka proceduar më tej.
AKK vlerëson se ky grant do të mundësonte punësimin e më shumë profesionistëve, sigurimin e mjeteve themelore të punës, investime në hapësira dhe siguri, kompensimin e angazhimit jashtë orarit, si dhe ofrimin e shërbimeve më cilësore për qytetarët.
Sipas këtij asociacioni, pothuajse të gjitha këto nevoja aktualisht mungojnë ose janë të pamjaftueshme në Qendrat për Punë Sociale (QPS).
Në reagimin e saj, AKK ka theksuar se punonjësit socialë vazhdojnë të punojnë edhe pas orarit të rregullt, pa mbështetjen e nevojshme, ndërsa përballen me raste të rënda dhe përgjegjësi të mëdha.
“Është e papranueshme të bllokosh mekanizmin e financimit dhe pastaj të kërkosh llogari vetëm nga komunat e punonjësit socialë. Kush jep përgjegjësi për këtë zvarritje shumëvjeçare?”, thuhet në reagimin e AKK-së.
Ky asociacion ka kritikuar edhe mënyrën se si Qendrat për Punë Sociale marrin vëmendje institucionale kryesisht pas rasteve të rënda, duke përmendur rastin në Pejë dhe vrasjen e një gruaje pranë QPS-së në Ferizaj.
Sipas AKK-së, pas këtyre ngjarjeve paralajmërohen inspektime, ndërsa nevojat e institucioneve që ofrojnë shërbime sociale vazhdojnë të mos adresohen.
“Çdo neglizhencë duhet të hetohet. Por inspektimet pas tragjedive nuk e shlyejnë përgjegjësinë për pengimin e financimit”, thuhet në reagim.
Në fund, AKK i ka bërë thirrje Ministrisë së Financave që ta procedojë menjëherë projektligjin, duke theksuar se mbrojtja e jetës dhe funksionimi i duhur i shërbimeve sociale nuk duhet të presin më.