Një aksident trafiku me fatalitet ka ndodhur sot rreth orës 13:40 në fshatin Jasiq të Junikut.
Në aksident është përfshirë një katërçikletë, ndërsa vozitësi i saj ka humbur jetën në vendin e ngjarjes.
Lajmin e ka konfirmuar zëdhënësi i Policisë së Kosovës për Rajonin e Pejës, Driton Rugova.
“Me datën 12.09.2026, rreth orës 13:40, Policia është njoftuar për një aksident trafiku i cili ka ndodhur në fshatin Jasiq-Junik. Në këtë aksident ishte e përfshirë një katërçikletë. Si pasojë e aksidentit, vozitësi i katërçikletës ka ndërruar jetë në vendin e ngjarjes, gjë e cila është konstatuar nga ekipi mjekësor”, ka thënë Rugova.
Sipas tij, në vendin e ngjarjes kanë dalë njësitet relevante të Policisë, si dhe prokurori i shtetit.
“Me urdhër të prokurorit të shtetit, trupi i pajetë i viktimës është dërguar në IML në Prishtinë për obduksion”, tha Rugova.
Rasti është duke u hetuar nga njësitet përkatëse.