Aleanca ka shprehur mbështetjen për çdo iniciativë ligjore dhe demokratike që synon garantimin e drejtësisë në procesin gjyqësor ndaj ish-krerëve të Ushtrisë Çlirimtare të Kosovës në Hagë.
Në një reagim publik, Aleanca ka përsëritur qëndrimin e saj institucional se lufta e UÇK-së për çlirimin e Kosovës ishte e drejtë dhe e pashmangshme.
“Duke besuar thellë se lufta e popullit të Kosovës për liri, e udhëhequr nga Ushtria Çlirimtare e Kosovës, ishte e drejtë, e pastër dhe e pashmangshme, qëndrojmë fuqishëm në bindjet tona”, thuhet në reagim.
Aleanca ka deklaruar gjithashtu se beson në pafajësinë e Hashim Thaçit, Kadri Veselit, Jakup Krasniqit dhe Rexhep Selimit në përfundim të procesit gjyqësor në Hagë.
“Besojmë se në fund të këtij procesi, Hashim Thaçi, Kadri Veseli, Jakup Krasniqi dhe Rexhep Selimi do të dalin të pafajshëm”, thuhet më tej.
Në fund, Aleanca u ka bërë thirrje Kosovës dhe institucioneve të saj që të angazhohen për të mbështetur procesin dhe për të kontribuar që ai të përfundojë me, siç shprehet, drejtësi të plotë.