Ambasada e Gjermanisë në Kosovë ka reaguar në përvjetorin e dytë të sulmit të armatosur në Banjskë, ku mbeti i vrarë rreshteri i Policisë së Kosovës, Afrim Bunjaku.
Përmes një deklarate publike, ambasada shpreh shqetësimin për mungesën e drejtësisë, dy vite pas ngjarjes, transmeton lajmi.net.
“Kanë kaluar dy vite që nga sulmi i tmerrshëm në Banjskë dhe megjithatë, udhëheqësi i vetëdeklaruar i sulmit, Milan Radoiçiq, vazhdon të jetojë i lirë në Serbi,” thuhet në reagimin zyrtar.
Ambasada kujton edhe vrasjen e policit Afrim Bunjaku dhe nënvizon se, pavarësisht premtimeve të shumta për vënien e autorëve para drejtësisë, asnjë përgjegjës nuk është ndëshkuar deri më sot.
“Kjo pandëshkueshmëri e qartë është e papranueshme. Është e domosdoshme që drejtësia dhe llogaridhënia të zbatohen pa asnjë vonesë të mëtejme,” thekson ambasada.
Sulmi i 24 shtatorit 2023 në fshatin Banjskë të Zveçanit u cilësua si një nga incidentet më të rënda të sigurisë në Kosovë që nga shpallja e pavarësisë, duke tronditur jo vetëm vendin, por edhe opinionin ndërkombëtar./lajmi.net/