Sekretari i përgjithshëm i Aleancës, Avni Arifi, ka kërkuar dorëheqjen e ministres së Drejtësisë, Donika Gërvalla, dhe ministrit të Punëve të Brendshme, Xhelal Sveçla, pas zhvillimeve lidhur me rastin e Arlinda Zekajt.
Arifi, në një adresim për medie, ka kritikuar konferencën e dy zyrtarëve të lartë të qeverisë, duke e cilësuar atë si “të poshtër”.
Sipas tij, paraqitja e tyre ka dëshmuar dështime në disa nivele të institucioneve që ata drejtojnë.
“Konferencë e poshtër e dy zyrtarëve publikë të Kosovës në raport me rastin që e ka tronditur çdo qytetar të Kosovës. Ata dëshmuan se ka dështime në shumë nivele të sistemit që drejtojnë. Arroganca e tyre, cinizmi i tyre, ishin neveritëse. Ne si Aleancë nuk kemi asnjë konkluzion tjetër, përveçse ekziston një përgjegjësi e qartë politike dhe ajo duhet të adresohet nga qeveria. Edhe Gërvalla edhe Sveçla duhet të japin dorëheqje”, ka deklaruar Arifi.